Tíðin rennur sum streymur í ár

Sálmurin “Tíðin rennur sum streymur í á” verður, eins og siðvenja er, sungin, áðrenn faklarnir verða tveittir á bátin.

Tíðin rennur sum streymur í á

1. Tíðin rennur sum streymur í á,
títt munnu bylgjurnar falla;
lítlum báti rekist eg á,
áraleysur at kalla.

2. Hvør ein løta og hvør ein stund
at stóra fossinum dregur;
treingist mítt hjarta, tyngist mín lund,
hvar er úr neyðini vegur?

3. Hvør hevur vinur vilja og mátt
at bjarga mær til landa?
Allir teir eru á líkan hátt
staddir sum eg í vanda.

4. Ein hevur vinurin vilja og mátt
at bjarga mær frá grandi;
Jesus kann føra mín lítla bát
trygt at himnasandi.

5. Tíðin rennur sum streymur í á
fram í Harrans navni!
Lítlum báti eri eg á, –
himnastrond fyri stavni.

Fr. Petersen 1892.

Bookmark permalink.

Lukket for kommentarer